Finnmárkku habiliterenbálvalusa rávisolbmuide (HAVO)

HAVO lea fágaidrasttideaddji joavku mas leat mielde suodjalandivššárat, pedagogat, fysioterapevta, ergoterapevta, mánáidsuodjaluspedagoga, sexologa, sámi ráđđeaddi, doavttir ja neuropsykologa.

Ulbmiljoavku

Olbmot geain lea riegádeame rájes vihki dahje geat leat nuorran ožžon vigi mii mielddisbuktá máŋggabealat hástalusaid dahje doaibmaváttuid mat dárbbašit spesialiserejuvvon habiliterema. Olbmos sáhttá leat kognitiiva doaibmahehttejupmi (doaimmashehttejupmi) ja/dahje ollislaš ovdánanhehttehusat, autisma dahje iešguđetlágan syndromat.  Muhtun olbmuin ulbmiljoavkkus eai leat kognitiiva váillit, muhto eará kompleaksa dilálašvuođat mat mielddisbuktet duođalaš ja máŋggabealat váttuid.

Bargu ovttaskasáššiiguin sáhttá leat:

• Guorahallan
• Diagnostiseren
• Plánet ja bidjat johtui spesialiserejuvvon habiliterema
• Giella ja gulahallan
• Demeansa go lea doaimmashehttejupmi
• Láhttenváttut go lea doaimmashehttejupmi ja autisma

Guorahallan sáhttá earret eará leat neuropsykologalaš iskkadeapmi, somáhtalaš iskkadeapmi, praktihkalaš dáidduid kárten ja jearahallamat pasieanttain, oapmahaččaiguin ja lagasolbmuiguin. Dát dáhpáhuvvá dábálepmosit doppe gos pasieanta orru su ruovttusuohkanis, muhto sáhttá maid čađahuvvot poliklinihkalaččat.

Árvvoštallan/veahkki dearvvašvuođa- ja fuolahusbálvaluslága 9. kapihttala mielde lea dehálaš oassi bargobargguin.

Bagadallan/čuovvoleapmi

Guorahallama bohtosat ovdanbuktojuvvojit (soahpama mielde) njálmmálaččat olbmui alccesis ja guoskevaš ovttasbargoguimmiide/lagasolbmuide ja oapmahaččaide. Čálalaš máhcahat sáddejuvvo álo dasa gii lea čujuhan pasieanta. Rávvagat ja bagadusat addojuvvojit dan vuođul maid guorahallan čájeha.  Dát sáhttá addit rievttabut divššu/doaibmabijuid sihke olbmui alccesis, heiveheapmái ja birasbargui. Dárbbuid ja áigeguovdilis váttisvuođaid vuođul sáhttit mii bagadallat lagasolbmuid, čađahit doarjjaságastallamiid pasieanttain, searvat ovddasvástádusjovkui, searvat individuála plána ráhkadeapmái, rávvet eará guoskevaš instánssaid, oahpahit ja eará.

Habiliterenbálvalus fállá kurssaid nannet suohkaniid gelbbolašvuođa habiliterema birra.

Čujuhanrutiinnat HAVO:i