Fotodynámalaš liikedikšun

Sáhtát áinnas vuoiddadit Locobase Renew gokko liikki lea assai ja skálžon báikkiide maid áiggut gieđahallat PDT:in, maiddái ámadajuin. Álggát vuoiddadeami 7 beaivvi ovdal plánejuvvon dikšuma.

Vuoidda oktii beaivvis vihtta beaivvi, loahpat vuoidat guokte beaivvi ovdal dikšuma. Dát guoská vuosttaš dikšui.

Dus galgá leat buhtes ja vuoiddatkeahtes liikki.

Váldde mielde listtu mas oainnát bissovaš dálkasiid go boađát diibmui.

Don berret várret olles beaivvi dikšumii. Liiki faskojuvvo dakko gokko galgá dikšojuvvot ja dasto bidjo vuoiddas dakko. Dan nala biddjo dasto loasttar mii galgá leat das 3 diimmu. Don sáhtát olggos mannat poliklinihkas dan áigodagas. Dasto lea juohke oassi čuovgga vuolde 10 minuhtta.

Buohccedivššár lea das go leat čuovgadikšumis.

Dikšun sáhttá dagahit bákčasiid dan botto go čuovgá ja vel moadde diimmu maŋŋil. Man bávččas dovdo sáhttá rievddadit.Dálkasat bákčasiid vuostá nugo Paracet láve dábálaččat geahpidit dáid bákčasiid. Muhtumin geavahit báikkálaš jámihanávdnasa ovdal divššu.

Vuosttaš vahkku fertet rehkenastit bohtaneami, ruvssodeami ja golgosiid boahtit dikšunsajiin. Loastara molssut dárbbu mielde. Sáhtát riššudit ja basadit nu go dábálaččat. Jus háve nala šaddá hávvegarra de berre dat leat dan nalde dássážii go ieš gahččá eret. Sáhttá ádjánit guovttis gitta njealji vahkkui dassá hávvi lea savvon.

Rávvejuvvo ahte dikšojuvvon liiki suddjet beaivvážis dan vuosttaš jagi. De sáhtát suddjet biktasiiguin dahje loasttarin, dahje vuoidat beaivvášvuoiddasin mas lea faktor 30–50.