Báhppa- ja ságastallanbálvalus, Hámmerfeasta buohcceviessu

Pasieanttat, oapmahaččat ja bargit sáhttet go háliidit ja go lea dárbu boahtit báhppa- ja ságastallanbálvalussii. Báhppa- ja ságastallanbálvalusas bargá buohcceviessobáhppa Karen Lorentzen.

Navn

Karen Lorentzen

Buohcceviessobáhppa

karen.lorentzen@finnmarkssykehuset.no

91182776

Karen lea vihahuvvon báhppa ja sus leat máŋga liigeoahpu, earret eará suorggis sielumoraš ja ságastallan buohcceviesus.

Ságastallan

Buozanvuohta ja eahpesihkarvuohta dearvvašvuođa ja iežas boahtteáiggi ektui čuohcá min čiekŋalis ja vuđolaš eallinárvvuide. Ii leat eaktun beassat deaivvadit báhpain ahte lea seamma osku go girkus. Vuolggasadji ságastallamii lea ahte don dárbbašat soapmása gii sáhttá guldalit du go don leat váttis eallindilálašvuođas, ja go háliidat juogadit jearaldagaid mat leat du váimmu lahka. Báhppa galgá diktit ságastallama leat ságastallanguoimmi eavttuid vuođul. Báhpas lea jávohisvuođageatnegasvuohta, ságastallan ii muitaluvvo viidáseappot oktiige, iige čállo journálaide.

Girkolaš doaimmat

Buohcceviessobáhppa čađaha girkolaš doaimmaid nugo gásta, eahkedismállásat ja rihpat/suttudovddastus, ipmilbálvalus ja rohkosbottut, vihaheapmi,  gistorahpan/ rohkosbottoš gisttu guoras, muitoboddu ja hávdádeapmi. Báhppa sáhttá ovttas bearrašiin oassálastit rohkosbottus dahje ovttastallamis dakka maŋŋel jápmima, ovdal go son gii lea jápmán biddjo gistui.

Lihkohisvuođat ja roasut

Dehálaš oassi báhppa- ja ságastallanbálvalusa barggus lea leahkit doarjjan ja veahkkin pasieanttaide ja oapmahaččaide lihkohisvuođaid ja buozalmasvuođaid oktavuođas.  Dat guoská sihke “smávva” lihkohisvuođaide mat eai namuhuvvo mediain, ja stuorát lihkohisvuođaide ja roasuide.

Fágaidrasttildeaddji ovttasbargu

Báhppa- ja ságastallanbálvalus sáhttá lea resursan ja ovttasbargoguoibmin buohcceviesu eará fágajoavkkuide. Fágaidrasttildeaddji ovttasbargu čađahuvvo oahpahusa, bagadallama ja ságastallamiid bokte.

Eará osku- ja eallinoaidnoservodagat

Pasieanttat geat gullet eará religiovnnaide dahje eallinoainnuide go Norgga Girku sáhttet oažžut oktavuođa sin servodagain jus dan háliidit. Báhppa- ja ságastallanbálvalus sáhttá veahkehit láhčit oktavuođa.

Hámmerfeastta buohcceviesus lea sierra rohkoslatnja muslima pasieanttaide ja bargiide. Jeara bargiin gos dat lea.

Mo oažžut oktavuođa buohcceviessobáhpain?

Buohcceviessobáhppa ii mana bovdetkeahttá buhcciidlanjaide. Bargit sáhttet veahkehit láhčit oktavuođa báhpain. Don sáhtát ieš maid váldit oktavuođa báhpain telefovnna, e-boastta bokte dahje finadit su kantuvrras.