Sámi oahppan- ja hálddašanguovddáš

Sámi oahppan- ja hálddašanguovddáš galgá áimmahuššat sámi pasieanttaid ja sin oapmahaččaid. Mis leat sihke somáhtalaš ja psykiátralaš kursafálaldagat. Psykiátralaš kursafálaldagat leat našunála fálaldagat olleš sámi álbmogii. Min kurssat leat kultuvrralaččat heivehuvvon ja muhtun kurssaid fállat maid sámegillii.

Oahpahus ja hálddašeapmi lea dehálaš pasieanttaid ja oapmahaččaid dearvvašvuhtii ja eallinkvalitehtii, ja dát lea okta buohcceviesuid váldobargguin. Oahpahus dáhpáhuvvá deaivvademiin dearvvašvuođabargiiguin ovdal - divššu vuolde ja maŋŋel divššu. Pasieantaoahpaheamis galgá leat fokus das, ahte pasieanttat ja sin oapmahaččat leat aktiivvalaš olbmot, geat galget sáhttit váikkuhit iežaset vásáhusaiguin ja resurssaiguin iežaset ođđa dillái. Vai pasieanttat galget sáhttit dahkat iežaset válljejumiid, de fállat mii oahpaheami. Dearvvašvuođabargit galget sihkkarastit divššu mii movttiidahttá pasieanttaid ja oapmahaččaid šaddat eanet iešheanalažžan.

Pasieanttat ja sin oapmahaččat sáhttet dasa lassin searvat joavkooahpaheapmái, nu gohčoduvvon oahppan- ja hálddašankurssaide, mat leat čadnon dihto diagnosaide.  Kursajođiheaddjit leat dearvvašvuođabargit ja sis lea váldoovddasvástádus kurssaid čađaheapmái. Juohke kurssas leat maid hárjánan geavaheaddjit geat muitalit mo leat eallit sin diagnosain.

Bajilgovva kurssain ja oahpahusas Sámi Klinihkas ja Finnmárkku buohcceviesus.