Digaštalle SÁNAG barggu ja boahtte áiggi
SÁNAG, Sámi Klinihkka muitalii jahkásaš dialogačoahkkimis maid lea doaimmahan vássán jagi. Čoahkkimis lei maid sáhka man láhkai Sámi Klinihkka galggašii ovdánit ja šaddat eamiálbmotguovddážin.
Sámi našuvnnalaš gealbobálvalus (SÁNAG) bovdii mannan vahkkus jahkásaš dialogačoahkkimii. SÁNAG fágalaš referánsajoavku, SÁNAG geavaheddjiidráđđi, SÁNAG DjO-stivra, Sámi Klinihka jođihangoddi ja SÁNAG DjO čállingoddi ja dutkit deaivvadedje Romssas.
Jahkásaš dialogačoahkkimis muitaluvvo maid SÁNAG lea bargan ja olahan vássán jagi. SÁNAG fágalaš referánssa joavkkus lea váldoovddasvástádus ja galgá fuolahit ahte doaibma jođihuvvo láhkačállosiid áigumušaid vuođul. Bálvalus galgá dásseárvosaš ja olámuttos buot geavaheddjiide miehtá riikka.
SÁNAG:a ovddasvástádussan lea čohkket ja gaskkustit gelbbolašvuođa psyhkalaš dearvvašvuođa ja gárrendili birra nu ahte sámi pasieanttat oččoše kultuvrralaš heivehuvvon divššu masa lea sihke riekti ja dárbu.
Photo: Foto: S. G. Lunde, SUS
- Mii eat leat deaivvadan fysalaččat máŋgga jahkái ekonomiija ja pandemiija geažil, nu ahte lei hui buorre ja ávkkálaš fas čoahkkanit ja digaštallat dilálašvuođa, hástalusaid ja vejolašvuođaid. Vaikke SÁNAG lea sajáiduvvon spesialisttadearvvašvuođabálvalus, de berre boahtte áiggis ovdánit sierra eamiálbmotguovddážin mii maiddái lea doarjjan gielddaide. Mun doaivvun ahte guovddáš eiseválddit ásahivčče gulahallama ránnjáriika dearvvašvuođaeiseválddiiguin vai beasaše guorahallat vejolašvuođaid ásahit guovddáža mas livččii ovddasvástádus fállat bálvalusa olles Sápmái, lohká SÁNAG fágalaš referánsajoavkku jođiheaddji Geir Sverre Braut.