- Dán leat guhká vuordán
Go dearvvašvuođa- ja fuolahusministtar Jan Christian Vestre galledii Kárášjoga, de almmuhii sámi spesialisttadearvvašvuođabálvalusaid áššedovdilávdegotti man ráđđehus lea ásahan. Dát galgá earret eará árvvoštallat lea go Sámi Klinihka dálá organiseren heivvolaš. Klinihkkajođiheaddji illuda go dát bargu álggahuvvo.
Odne galleda dearvvašvuođa- ja fuolahusministtar Jan Christian Vestre Finnmárkku.
Vuosttaš bisánanbáiki lei Kárášjohka gos galledii ja čoahkkinasttii Sámedikkiin ja Sámi Klinihkain.
- Mun illudan go ministtar finai dáppe. Mii beasaimet čájehit Sámi Klinihka, muitalit iežamet ja sámi pasieantta birra. Son beasai maid deaivvadit min pasieanttaiguin, lohká klinihkkajođiheaddji Amund Peder Teigmo.
Almmuhii áššedovdilávdegotti
Galledeami oktavuođas almmuhii dearvvašvuođa- ja fuolahusministtar stuora ođđasa. Ráđđehus lea ásahan áššedovdilávdegotti mii galgá árvvoštallat man láhkai stáhta áimmahuššá sámi álbmoga spesialisttadearvvašvuođabálvalusaid. ILO-konvenšuvdna geatnegahttá Norgga fállat dásseárvosaš dearvvašvuođabálvalusaid sápmelaččaide.
- Mii leat ráhkadan nana mandáhta ja nammadan čeahpes láhttuid áššedovdilávdegoddái, lohká Vestre preassadieđáhusas.
Lávdegoddi galgá earret eará guorahallat mo sámi spesialisttadearvvašvuođabálvalusat fuolahuvvojit dál iešmearrideami, oassálastima ja ovttasbarggu olis.
- Mii leat hui duhtavačča go áššedovdilávdegoddi lea ásahuvvon. Dán nammii lea Sámediggi bargan, ja mii illudit lohkat lávdegotti árvvoštallamiid ja rávvagiid, lohká sámediggeráđđi Runar Myrnes Balto ráđđehusa neahttasiidui.
Illuođas
Ođđa áššedovdilávdegotti bargun lea árvvoštallat lea go Sámi Klinihka dálá organiseren heivvolaš. Dasa lassin galget gávnnahit man láhkai Sámi našuvnnalaš gealbobálvalusa - psyhkalaš dearvvašvuođasuddjemis ja gárrendilledivššus (SÁNAG) sáhttet ovdánahttit. Lávdegoddi galgá maid geahčadit man láhkai sáhttá rekrutteret ja doalahit bargiid geain lea sámi giella- ja kulturgelbbolašvuohta.
- Mii leat guhká vuordán dán mearrádusa. Sámi Klinihka bargiide lea dárbbašlaš ahte boahtte áiggi organiseren čielggaduvvo, lohká klinihkkajođiheaddji Amund Peder Teigmo.
Ráđđehusa ulbmil dáinna bargguin lea sihkkarastit dásseárvosaš dearvvašvuođabálvalusaid sámi álbmogiid. Dát bargu lea dehálaš nannen dihte sámi vuoigatvuođaid ja sihkkarastit dearvvašvuođabálvalusaid mat leat heivehuvvon sápmelaččaide.
- Mii galgat guldalit, oahppat ja doaimmahit ovttas. Háliidan giitit Sámedikki buori gulahallama ovddas ja illudan ain viidáset ovttasbargat olahan dihte dáid áigumušaid, lohká dearvvašvuođa- ja fuolahusministtar Jan Christian Vestre.