- Searvva ságastallamii
SÁNAG, Sámi Klinihkka lea mielde lágideamen iešguđetlágan iešsorbmeneastadanarenaid. 350 oassálastet “Ingen manns land” konferánssas mii lágiduvvo Romssas, ja seamma eahkeda bodejuvvojit sápmelaččat Romssa Sámi Vissui ságastallat sámi servodaga iešsorbmenhástalusaid birra.
Davvi RVTS, Vivat iešsorbmeneastadeapmi ja SÁNAG lágidit konferánssa “Ingen manns land – å bryte barrierer i møte med selvmordstanker”. Konferánsa fuomášuhttá iešsorbmema, iešsorbmenjurdagiid ja vásáhusaid dievdoolbmuid perspektiivvas. Lágideapmi lea Romssas čakčamánu 19. beaivvi.
SÁNAG doavttergrádastipendiáhtta ja Vivat iešsorbmeneastadeami seniorráđđeaddi Marianne Larssen muitala ahte leamaš stuora beroštupmi konferánsii mas dieđihanáigemearri dievai árat dán mánus.
- Konferánsii leat dieđihuvvon 350 oasseváldi ja sii bohtet miehtá riikka. Almmolaš bálvalusain ja veahkkeapparáhtas barget olu nissonat ja olu konferánsaoasseváldit leat nissonat. Konferánssas geiget mikrofovnna dievdduide geat hállet iešsorbmema birra iežaset perspektiivvas. Mis leat miellagiddevaš ja hui iešguđetlágan logaldallit konferánssas; badjeolmmoš guhte ieš lea massán lagas olbmuid iešsorbmemii, filosofa ja báhppa, psykologa ja kriisa- ja bántafáŋgašiehtadalli muitalit fáttás mii lea servodaga stuorámus álbmotdearvvašvuođahástalusaid searvvis, lohká son.
Deaddil dás ja loga eanet konferánssa birra.
Sámit ságastallet
Maŋŋel konferánssa bovdejuvvojit sápmelaččat Romssa Sámi Vissui gos vuolggahit ságastallama sámi servodaga iešsorbmenhástalusaid birra. Ulbmil lea ságastallamiid bokte reflekteret mo sáhttit eastadit iešsorbmemiid ja mo sáhttit suddjet sámi servodaga iešsorbmenváttisvuođain.
Romssa Sámi Viesu lágideames lea álkes guossoheapmi ja álgá diibmu 19:00. Sámi dáiddár Simon Issát Marainen, guhte ieš lea massán guokte viellja iešsorbmemii, juoigá doaluid oktavuođas.
- Romssa Sámi Viessu háliida leat arena gos maiddái sáhttit guoskkahit ja ságastallat sámi servodaga váttis fáttáid birra. Muhtimiidda lea váttis ja kánske tabu hállat iešsorbmema birra. Romssa Sámi Viesu bealis háliidit eanet rabasvuođa fáttá birra ja danin ávžžuhit olbmuid boahtit ja vuolggahit ságastallama, lohká Larssen.
Dás gávnnat eanet dieđuid lágideami birra.
Dehálaš bargu
SÁNAG, Sámi Klinihkas lea sierra iešsorbmeneastadeami doaibmaplána, ja oassin dán barggus lea čađahit eastadanbargguid ovttas earáiguin.
Doavttergrádastipendiáhtta Marianne Larssen dadjá ahte lea dehálaš ahte SÁNAG váikkuha ja oassálastá iešsorbmeneastadanbarggus sámi servodagas.
- Lea dehálaš ahte SÁNAG oassálastá lágidemiin ja čalmmustahttá iežas dehálaš fágalaš arenain ovttas Davvi RVTS:in ja Vivat iešsorbmeneastademiin.