Oahpaheigga lagabui 70 skuvlabargái áicit iešsorbmenjurdagiid
Go dávjjit fuomášit iešsorbmenjurdagiid, de eastadit iešsorbmemiid servodagas, oaivvildeaba SÁNAG kursajođiheaddjiguovttos Anna Rita Spein ja Anne Cath. Silviken.
SÁNAG ulbmil lea nannet iešsorbmeneastadeami máhtolašvuođagaskkustemiin. Sierra doaibmaplánas celkojuvvo ahte ovttasbargu sámi báikegottiiguin lea dehálaš doaibmabidju dán barggus.
Borgemánu 15. ja 16. beivviid lágidii SÁNAG «Áicit iešsorbmenvára» kurssa sihke Kárášjogas ja Guovdageainnus. Kárášjoga mánáid- ja nuoraidskuvllas ja astoáiggefálaldagas oassálaste 36 bargi ja Sámi joatkka- ja boazodoalloskuvllas ges 31 bargi.
- Oallugat sáhttet čađahit iešsorbmeneastadeami Sámis, ja sihke skuvllat ja astoáiggefálaldagat leat dehálaš arenat fuomášit mánáid ja nuoraid geain lea lossa dilli ja iešsorbmenjurdagat. Kurssa mihttu lea nannet oasseváldiid čađahandáiddu áicit ja veahkehit olbmuid geat rahčet iešsorbmenjurdagiiguin. Dáinna dehálaš gelbbolašvuođain eastadit iešsorbmemiid iežamet servodagas, dadjaba SÁNAG kursajođiheaddjiguovttos Anna Rita Spein ja Anne Cath. Silviken.
Soai giitiba ovttasbarggu ovddas sihke plánendásis ja čađaheami oktavuođas. Finnmárkku stáhtahálddašeaddji, mii maiddái bargá iešsorbmeneastademiin, ruhtadii kurssaid.