Sámi spesialistadearvvašvuođabálvalusaid áššedovdilávdegotti ođđa raportta ovdanbuktojuvvon
Áššedovdilávdegotti raporta sámi spesialistadearvvašvuođabálvalusaid birra addá dehálaš máhttovuođu viidáset ovdánahttit dásseárvosaš spesialistadearvvašvuođabálvalusaid sámi álbmoga várás.
Frode Boyne ovdanbuvttii raportta čoahkkimis masa earret eará Sámi klinihka ja Psyhkalaš dearvvašvuođasuddjema ja sorjjasvuođaovttadaga jođiheaddjit serve. Son ovdanbuvttii raportta váldogávdnosiid, árvvoštallamiid ja árvalusaid.
Raporta guoskkaha máŋga guovddáš suorggi Sámi klinihkas, earret eará klinihka nationála ovddasvástádusa, fágalaš ovdáneami ja sámi spesialistadearvvašvuođabálvalusaid boahttevaš organiserema.
Dehálaš máhttovuođđu
Áššedovdilávdegotti raporta sámi spesialistadearvvašvuođabálvalusaid birra lea viiddis ja dehálaš bargu ja čalmmustahttá sámi pasieanttaid dárbbuid ja vuoigatvuođaid, ja maiddái sámi giella- ja kulturgelbbolašvuođa mearkkašumi spesialistadearvvašvuođabálvalusas.
Lea buorre go dát fáttát ožžot fuomášumi nationála dásis, ja go raporta addá máhttovuođu viidáset ovddidit bálvalusaid.
Váikkuhusat eai leat vuos čielggaduvvon
Áššedovdilávdegotti ávžžuhusat galget dál viidáseappot gulaskuddamii ja politihkalaš meannudeapmái.
Dan dihte lea vuos árrat dadjat makkár konkrehta váikkuhusat dás vejolaččat leat Sámi klinihka ektui.
Dán dásis lea dehálaš sihkkarastit stabilitehta ja einnostahttivuođa sihke pasieanttaide ja bargiide. Seammás mii joatkit min barggu fágaovddidemiin ja bálvalusaid buoridemiin dálá rámmaid siskkobealde.
Giitit mielbargiid dehálaš áŋgiruššama ovddas
Mii háliidit maiddái erenoamážit giitit min guovtti mielbargi, Frode Boyne ja Tuva Svendsena, geat leaba leamašan mielde áššedovdilávdegotti barggus.
Sudno áŋgirvuohta, gelbbolašvuohta ja oassi dán dehálaš barggus lea árvvolaš — sihke Sámi klinihkkii ja sámi spesialistadearvvašvuođabálvalusaid ovddideapmái nationála dásis.
Mii áigut čuovvut viidáset proseassa ja leat veahkkin min vásáhusaiguin ja gelbbolašvuođain doppe gos lea lunddolaš. Mihttun lea sihkkarastit buriid ja dásseárvosaš spesialistadearvvašvuođabálvalusaid sámi álbmogii.