Váldá badjelasas virggi OHG-koordináhtorin

Mariell Selnes Paulsen lea oahppan sosionoma ja lea dán jagi bargan Sámi Klinihka ofelažžan. Moatti vahkku áigi lávki ođđa virgái. Son lea min ođđa OHG-koordináhtor.

- OHG-koordináhtorin oainnán vejolašvuođa nannet Sámi Klinihka oahpahus- ja hálddašanfálaldaga, ja dán barggus dáhtun deattuhit sámi álbmoga rivttiid oažžut dásseárvosaš spesialisttadearvvašvuođabálvalusaid. Munnje lea dehálaš láhčit oadjebas ja fátmmasteaddji oahppobirrasa mas pasieanttat ja oapmahaččat vásihit ahte dohkkehat ja áimmahuššat sin dárbbuid ja kultuvrra. Mus leat alla vuordámušat ođđa bargui ja sávan ahte beasan nannet ja ovdánahttit OHG-fálaldaga sihke fágaidgaskasaš ovttasbarggu ja geavaheddjiid váikkuheami bokte. Mun dáhtun maid fátmmastit sihke julesámi ja máttasámi dán barggus go Sápmi gokčá stuora osiid Norggas, lohká son.  

Go olmmoš buohccá, de galget Oahppan- ja hálddašanguovddážat oahpahit pasieanttaid ja oapmahaččaid diagnosa ja divššu birra. Sii galget maid oažžut diehtojuohkima eallinrievdadusaid birra ja mo eallit dávddain. Mariell Selnes Paulsen bargun lea láhčit Sámi Klinihka OHG-kurssaid.

- Sámi Klinihkka lea áito ásahan OHG-bargojoavkku masa buot ovttadagat leat nammadan ovtta láhttu. Mun doaivvun ahte bargojoavkkus nákcet ovdánahttit ja olahit bissovaš oahpahus- ja hálddašanfálaldaga. Bargojoavku lea nanus go leat čohkken buot ovttadagaid gos bargiin lea iešguđetlágan hárjánupmi ja gelbbolašvuohta. Min ulbmilin lea ovttas ásahit dynámalaš oahpahus- ja hálddašanfálaldaga mii ovdána pasieanttaid ja oapmahaččaid dárbbuid vuođul, loahpaha Paulsen.