Min ovttasbargoprošeakta lea olahan Árktalaš ráđi
Prošeakta «Arctic Bereavement Support Group», mii galgá nannet veahki ja doarjaga mii fállojuvvo árktalaš guovllu maŋisbáhcciide maŋŋel iešsorbmema, lea beassan Árktalaš ráđi ceavzilis ovdáneami bargojovkui.
Ovttasbargoprošeakta «Arctic Bereavement Support Group», man VID jođiha ja mas SÁNAG lea oassin, lea válljejuvvon Árktalaš ráđđái.
Árktalaš ráđđi lea deháleamos internašunála foruma gos digaštallet áššiid mat gusket árktalaš guovllu stáhtaide ja gos erenomážit deattuhit birrasa, dálkkádaga ja ceavzilit ekonomalaš ovdáneami. Árktalaš ráđđi fátmmasta Canada, Dánmárkku, Suoma, Islándda, Norgga, (Ruošša), Ruoŧa ja USA.
Árktalaš ráđi doaimmaid čađahit guđa bargojoavkkus, ja min prošeakta lea válljejuvvon ceavzilis ovdáneami bargojovkui. Bargojoavkku váldoprinsihppa lea čuovvulit doaimmaid mat buvttadit praktihkalaš gelbbolašvuođa ja váikkuhit vejolašvuođaid nannet álgoálbmogiid ja árktalaš servodagaid kapasitehta čoavdit hástalusaid ja ávkkástallat guovllu vejolašvuođaid.
Maŋisbáhcciid veahkki ja doarjja
«Arctic Bereavement Support Group» prošeavtta váldoulbmilin lea nannet veahki ja doarjaga man árktalaš guovllu maŋisbáhccit ožžot maŋŋel go vásihit iešsorbmema lagas birrasis. Iešsorbmen lea duođalaš álbmotdearvvašvuođahástalus árktalaš guovlluin, ja máŋgga álgoálbmotservodagain leat erenomáš olu iešsorbmemat.
VID lea ovttasbargan Norgga, Dánmárkku/Ruonáeatnan ja Islándda klinihkalaš bargiiguin ja dutkiiguin 2023 čavčča rájes buoredan dihte ja ođasmahttin dihte dálá fálaldaga man maŋisbáhccit ožžot maŋŋel iešsorbmema.
Dássážii lea čađahuvvon jearahallanguorahallan mas maŋisbáhccit serve. Dáhtačoaggin lea gárvvis, ja dássážii čájehuvvo ahte bohtosat sáhttet muitalit mii maŋisbáhcciid mielas lea deháleamos morraša doarjjabarggus.
Prošeaktajoavku ovdánahttá morašdoarjjajoavkkuid málle, ja mii sávvat ahte sáhttit álggahit digitála morašjoavkku pilohtaprošeavtta 2026:s.