SÁNAG – Sámi Klinihka našuála bargojoavku lea viiddidan doaimmas ja fállagoahtán divššu Troandimis.

Dikšobáikkis lei almmolaš rahpan bearjadaga, miessemánu 9. beaivvi.

- Finnmárkku buohcceviesu direktevra Ole Hope logai rahpansártnistis ahte lea dehálaš nannet sámi ovttasbarggu máddin, davvin, oarjin ja nuortan. Nu ahte midjiide lea áibbas lunddolaš áŋgiruššat Mátta-Sámis, lohká Sámi Klinihka jođiheaddji Amund Peder Teigmo.

Olbmot leat mielas fálaldahkii

Našunála bargojoavkkus leat guokte bargi Troandima kantuvrras, ja soai leaba fállan psyhkalaš dearvvašvuođadivššu mannan čavčča rájes.

- Kantuvra leamaš doaimmas jo muhtin áigge ja olbmot leat bures vuostáiváldán fálaldaga, lohká Teigmo.

SÁNAG – Sámi Klinihkas leamaš ovdal kantuvrabáiki Snoasas, muhto dikšobáikki gárte sirdit Troandimii go guhkit áigge badjel eai nákcen rekrutteret bargiid. Troanddin-kantuvrra bargit galget johtit Snoasai ja ovttas Plassje kantuvrrain galget fállat divššu olles Mátta-Sápmái.

Rahpandoalut lihkostuvve

SÁNAG – Sámi Klinihka ođđaseamos dikšobáikki rahpandoaluin doalai Finnmárkku buohcceviesu direktevra Ole Hope rahpansártni ja Sámi Klinihka jođiheaddji Amund Peder Teigmo sáhkavuorus  lei kultuvra ja kulturheivehuvvon fálaldagat guovddážis. Mátta-Sámi kulturgaskkusteaddji Jon Isak Gælok juoiggai rahpama oktavuođas. Gussiide guossohedje goikebierggu ja gáhkuid.

- Rahpandoalut ledje árvvolačča ja lihkostuvve bures, loahpaha klinihkkajođiheaddji Teigmo.    

SÁNAG – Sámi Klinihka kantuvra lea Sirkus gávpeguovddážis.