Josefine lea dulkonbálvalusa ođđa jođiheaddji – ja Ellen Ravna lea ruovttuluotta dulkan
Sámi dulkonbálvalusa ođđa ovttadatjođiheaddji Josefine Somby lea gearggus álgit bargguiguin mat vurdet. Son illuda earenoamážit prosessii ovdánahttit sámi dulkonbálvalusa našunála bálvalussan. Josefine álggii virgái mannan vahku ja lea dál sajis Kárášjogas, gos sus lea bargobáiki Sámi Klinihka kantuvrrain Stuorraluohkás.
Josefine lea dulkonbálvalusa ođđa jođiheaddji – ja Ellen Ravna lea ruovttuluotta dulkan
Sámi dulkonbálvalusa ođđa ovttadatjođiheaddji Josefine Somby lea gearggus álgit bargguiguin mat vurdet. Son illuda earenoamážit prosessii ovdánahttit sámi dulkonbálvalusa našunála bálvalussan.
Josefine álggii virgái mannan vahku ja lea dál sajis Kárášjogas, gos sus lea bargobáiki Sámi Klinihka kantuvrrain Stuorraluohkás.
Josefine lea eret Guovdageainnus. Son lea 2024 rájes bargan dulkan sámi dulkonbálvalusas. Su oahppoduogáš lea earenoamášpedagogihkka ja sus lea vásáhus fágabirrasiin nugo Statsped/ SEAD ja PPT - sihke ráđđeaddin, earenoamášpedagogan ja jođiheaddjin. Sus lea maiddái mánáidgárdejođiheaddji duogáš ja hárjáneapmi suohkanlaš dulkabarggus Dáinna duogážiin buktá son mávssolaš gelbbolašvuođa dulkonbálvalusa jođiheapmái.
Áigu dahkat bálvalusa eanet oidnosii
– Mun háliidan ovdánahttit dulkonbálvalusa ja dahkat dan eanet oidnosii, sihke siskkáldasat dearvvašvuođaásahusain ja olgguldasat. Dulkonbálvalusas galgá šaddat našunála bálvalus, ja dan oktavuođas lea diehtojuohkinbargu hui dehálaš. Dássážii lea sámi dulkonbálvalus fállan dulkomiid davvisámegillii, muhto go mii dál šaddat našunála bálvalussan, de galgat fállat dulkoma maiddái mátta- ja julevsámegillii. Ná mii leat mielde fállamin dásseárvosaš bálvalusaid maiddái mátta- ja julevsámegielagiidda go sii leat oktavuođas spesialistadearvvašvuođabálvalusain, lohká ođđa jođiheaddji.
Ođđa jođiheaddjái lea maid dehálaš ovdánahttit sámegiela ja sihkkarastit ahte sámi pasieanttain ja geavaheddjiin lea vejolašvuohta geavahit iežaset eatnigiela spesialistadearvvašvuođabálvalusas.
– Mun doaivvun maid ahte dearvvašvuođabargiid oahpaheapmi váikkuha ahte sii eanet geavahit sámegiela deaivvadeamis sámi pasieanttaiguin, lohká Josefine Somby.
Ellen Ravna fas dulkan
Maŋŋel oanehis áiggi ealáhagas, de lea oahpes ámadadju fas oidnomis Hámmerfeastta buohcceviesu feaskáriin. Ellen Ravna Sara lea miehtan bargat gaskaboddosaš dulkan gitta loahppageassái.
Elle Ravna manai ealáhahkii mannan geasi, muhto ealáhatáigi ii šaddan guhkki dán háve. Go dárbu gaskaboddosaš bargái čuožžilii, de lei lunddolaš jearrat ovddeš hárjánan dulkkas. Elle Ravnna ii lean váttis bivdit go oaččui jearaldaga sáhtášii go veahkehit dulkonbálvalusa ovtta áiggi. Son bargá dál sadjásažžan dassážiigo ođđa, fásta beaivedulka lea sajis, ja lea lohpidan bargat gitta 31.07.26 rádjái.
Sámegielat pasieanttaide mearkkaša dat ahte buorre gulahallan lea ain sihkkarastojuvvon go sii leat buohcceviesus. Elle Ravna lea bargan measta guhtta jagi dulkan, ja lea dál fas gearggus veahkehit sámegielat pasieanttaid geain lea diibmu dahje geat leat sisa čálihuvvon Hámmerfeastta buohccevissui dahje eará Helse Nord buohcceviesuide dahje klinihkaide.
Deaddil dákko jus háliidat lohkat eambbo sámi dulkunbálvalusa birra