Eatnigiella buktá oadjebasvuođa -geahčastat sámi dulkonbálvalussii
Sámi fáddávahkku leat leamašan máŋga borranboddo-logaldallama, ja maŋemus logaldallan masa bargit ledje bovdejuvvon,lei logaldallan Josefine Sombyin.
Logaldallamis «Gulahallat– sámi dulkka mearkkašupmi spesialistadearvvašvuođabálvalusas» čuvgii son dulkonbálvalusa rolla sámi pasieanttaid deaivvadeamis spesialistadearvvašvuođabálvalusain.
Somby lea bargan sámi dulkonbálvalusas fargga guokte jagi ja lea fásta beaivedulka Hámmerfeastta buohcceviesus.
Guovddáš fáddá su logaldallamis lei giela mearkkašupmi, erenoamážit deaivvadeamis spesialistadearvvašvuođabálvalusain.
– Máŋga pasieantta leat hearkkes dilis go leat buohccit ja oktavuođas spesialistadearvvašvuođabálvalusain. Dalle lea dehálaš ahte gulahallan doaibmá, deattuhii son.
Somby juogadii maid vásáhusaidis su olu pasieantadeaivvademiin.
– Eanas pasieanttat leat giitevaččat ja lohket dovdat oadjebasvuođa ja gullevašvuođa go besset gulahallat sámegillii dulkka bokte geas lea seammá kulturduogáš. Máŋgasii dát addá maid gullevašvuođadovddu buohccevissui go doppe besset sámástit.
– Go pasieanttat dovdet iežaset oadjebassan, de sii rahpasit eambbo ja muitalit maid eambbo sin buozalmasvuođa ja dili birra, muitala son.
Logaldallamis muitalii son maid obbalaččat sámi dulkonbálvalusa birra – mii sámi dulkonbálvalus lea, maid doppe barget, mo dulkka diŋgot, gii sáhttá diŋgot dulkka ja dulkonlága váldočuoggáid birra.
– Dulkonbálvalus galgá váikkuhit dasa ahte sámi pasieanttat ožžot dásseárvosaš bálvalusaid, deattuhii Somby.
Sámi fáddávahkku loahpahuvvo konsearttain bearjadaga. Árbevieru mielde lágida Finnmárkku buohcciviessu borranboddokonseartta Sámi álbmotbeaivvi oktavuođas. Sámi artista Elin Kåven doallá minikonseartta Álttá klinihkas, ja konsearta sáddejuvvo njuolgga Youtube bokte.