Giellavahkku 2025
Sámegielat dulka sajis
Sámi dulkonbálvalusas ii leat ovdal leamaš sierra dulka Álttá klinihkas. Dál lea Kari Lisbeth Hermansen sajis.
Kari Lisbeth Hermansenis lea eret Máze, su lea servodatfágalaš- ja giellafágalašoahppu, ja lassin bargui dulkonbálvalusas lea son dál bargamin mastergrádain sámegielas ja girjjálašvuođadiehtagis.
-Lean stuora oasi iežan bargoeallimis bargan sámegielain ja mus lea sámegiella leamašan bargogiellan, muitala 51-jahkásaš gii álggii virgái golggotmánu 1. beaivvi.
Dehálaš fálaldat
Finnmárkku buohcciviesus lea earenoamáš ovddasvástádus sámi dearvvašvuođabálvalusaide, ja min sámi dulkonbálvalus geavahuvvo miehtá Davvi Dearvvašvuođa. Álttá klinihkas ii leat ovdal leamaš sierra dulka, muhto mii leat geavahan dulkonbálvalusa digitála dulkonfálaldaga.
-Dát lea dehálaš nannen fálaldagain maid addit buot sámegielat buhcciide geat ožžot dikšunfálaldaga Álttás. Dušše Álttás ásset dál 3500 olbmo geat hupmet sámegiela, muitala klinihkkahoavda Renate Jakobsson.
Dál go Kari Lisbeth lea sajis lea mihttun buoridit kvalitehta dain vásáhusain mat sámi pasieanttain leat go deaivvadit dearvvašvuođabargiiguin, dan bokte ahte dulka sáhttá leat mielde lassiresursan divššárii.
-Mii háliidit deaivvadit sámi pasieanttaiguin sin váibmogillii, ja háliidit ahte min divššáriin lea dulka gii sáhttá dulkot divššára ja pasieantta gaskka, lohká Renate Jakobsson.
Sámegiel dulka lea bealátkeahtes bealli gii dulko gaskal divššára ja pasieantta. Dulkkas lea jávohisvuođageatnegasvuohta. Govva: Finnmárkku buohcceviessu/Arvu.
Giela ja kultuvrralaš duogáža mearkkašupmi
Go pasieanttat besset hupmat giela mii lea sin váimmu lagamusas, de sáhttet sii álkibut ovdanbuktit nyánssaid, dovdduid, jurdagiid ja muitalusaid maid muđui eai livčče sáhttán muitalit. Sámi dulkonfálaldat lea heivehuvvon kultuvrralaččat sámegillii, mii lea nannosit čadnon kultuvrii, identitehtii ja historjái.
-Giella, giellaseailluheapmi ja leat mielde láhčime dili nu ahte sámegielagat ožžot bálvalusaid sin eatnigillii lea lahka mu váimmu. Munnje lea dát stuora ja dehálaš bargu, lohká Kari Lisbeth Hermansen.
Sámi dulkonbálvalus dovdá sihke giela ja daid kultuvrras referánssaid mat sáhttet veahkehit divššára ipmirdit konteavstta, ja pasieanttat dovdet iežaset ipmirduvvon. Dulkkat váldet maid badjelasaset barggu maid olu oapmahaččat dávjá šaddet váldit, namalassii dulkot dan mii daddjo lanjas.
-Mii eat háliit ahte oapmahaččat galget doaibmat dulkan gaskal min dearvvašvuođabargiid ja pasieantta, go midjiide lea dehálaš ahte oapmahaččat besset leat oapmahaččat, dadjá Renate Jakobsson.