Svein Atle šaddá veahkke-klinihkkajođiheaddji
Svein Atle Somby lea virgáduvvon Sámi Klinihka veahkkeklinihkkajođiheaddjin. Son lea dál Kárášjoga sátnejođiheaddji, muhto álgá ođđa bargui maŋŋel geasseluomu.
- Go dát virgi almmuhuvvui, de in sáhttán eará go ohcat dasa. Dá han lea áibbas ođđa virgi ja lea erenomáš vejolašvuohta beassat mielde jođihit dákkár organisašuvnna, lohká Svein Atle Somby.
Ođđa organiseren
Finnmárkku buohcceviesus leat njeallje jođihandási, muhto ođđa organiserema oktavuođas sihkastuvvo okta dássi. Seammás ásahuvvojit njeallje veahkkeklinihkkajođiheaddji virggi dikšobáikkiide.
Sámi Klinihkka gullá dikšobáikkiid searvái ja oažžu ge ođđa veahkkeklinihkkajođiheaddji.
Svein Atle Somby lea 56 jagi boaris ja ássá Kárášjogas. Sus lea sámegiella eatnigiellan, ja son sihke hállá ja čállá davvisámegillii ja dárogillii. Son lea Kárášjoga sátnejođiheaddji, ja leamaš ámmáhis masá logi jagi. Somby dovdá Sámi Klinihka doaimma ja servodatovddasvástádusa bures go leamaš klinihkkabargin 2005 rájes. Son barggai iešguđetge ovttadagain dassážii go šattai sátnejođiheaddjin.
Nannejit klinihka
- Sámi Klinihkka nanne veagas Svein Atle:n, ja son šaddá dehálaš oassin go hukset dásseárvosaš ja allakvalitehta dearvvašvuođabálvalusaid, lohká klinihkkajođiheaddji Amund Peder Teigmo.
Svein Atle Somby lea ohcan luvvejuvvot sátnejođiheaddjin jo borgemánus, ja plána mielde álgá ođđa virgái maŋŋel geasi.
- Mii galgat čevllohallat Sámi Klinihkain mii fállá hirbmat buriid dearvvašvuođabálvalusaid sihke sámi álbmogiid ja earáide. Mun illudan álgit ođđa bargui, muhto seammás čájehan vuollegašvuođa ja giitevašvuođa go lean beassan leat sátnejođiheaddjin masá logi jagi, lohká Svein Atle Somby.