- Buot oasseváldit duhtavačča ADHD-kurssain
Gieskat lágidii Sámi klinihka oahpahan- ja hálddašanguovddáš ADHD-kurssa váhnemiidda ja fuolaheddjiide. – Buot oasseváldit ledje duhtavačča dahje hui duhtavačča, ja mii leat mearridan jo nuppi kurssa lágidit dán jagi, lohká oahppan- ja hálddašankoordináhtor Máret Rávná Boine.
Miehtá Norgga leat ásahuvvon oahppan- ja hálddašanguovddážat mat galget pasieanttaide ja oapmahaččaide doarjjan. Olbmos lea oainnat riekti oažžut vuđolaš diehtojuohkima ja oahpu diagnosa, divššu ja rievdadusaid birra mat dáhpáhuvvet eallimis buozalmasvuođa geažil.
Ođđajagimánus lágidii Sámi klinihka oahppan- ja hálddašanguovddáš ovttas SÁNAG Mánáid- ja nuoraidpsykiátralaš poliklinihkain ADHD-kurssa váhnemiidda ja fuolaheddjiide.
- Manai hui bures ja lei hui somá lágidit kurssa. Ovcci máná váhnema bohte kursii, nu ahte oktiibuot ledje 18 oassálasti. Lea hui stuora beroštupmi dán kursii, máŋggas leat váldán oktavuođa ja čájehan beroštumi oassálastit boahttevaš kurssaide. Danin leat mearridan ahte kursa lágiduvvo maiddái 2024 giđa, lohká Sámi klinihka oahppan- ja hálddašankoordináhtor Máret Rávná Boine.
Huksejit oktasaš gealbbu
Oahppan- ja hálddašankurssain beassá deaivvadit eará pasieanttaiguin, oapmahaččaiguin, hárjánan geavaheddjiiguin, geavaheaddji- ja berošteaddjiorganisašuvnnaiguin, dearvvašvuođabargiiguin ja eará fágabargiiguin. Dán arenas čatnet oktavuođaid, lonohallet vásáhusaid ja huksejit oktasaš gealbbu.
Sámi klinihka bealis vásihit ahte oasseváldit leat duhtavačča fálaldagain. ADHD-kurssa maŋŋel čađahuvvui geavaheaddjiiskkadeapmi.
- Buot oasseváldit vástidedje ahte ledje duhtavačča dahje hui duhtavačča kurssain. Dán vásihin maiddái kursabeaivvi go oasseváldit jearahedje áŋgirit ja čađahedje buriid ságastallamiid. Mii leat geahčadan ruovttoluottadieđuid ja smávva rievdadusaiguin buoredit kursafálaldaga vel eanet, lohká Boine.
ADHD-kurssas ledje 18 oasseváldi. Sámi klinihka oahppo- ja hálddašanguovddáš vásiha ahte oallugat váldet oktavuođa ja háliidit searvat boahttevaš kurssaide. Govven: Máret Rávná Boine, Finnmárkku buohcceviessu
Áidna kursafálaldat
Sámi klinihka oahppan- ja hálddašanguovddážis lea erenomáš ovddasvástádus sámi pasieanttain ja oapmahaččain. Danin geahččalit heivehit kurssaid sihke gielalaččat ja kultuvrralaččat.
ADHD-kurssa leat dássážii šaddan lágidit dárogillii go oassálastit bohtet miehtá Finnmárkku ja buohkat eai hálddaš sámegiela.
- Mii leat árvvoštallan dán moatti jagi áigi ja dalle dadje váhnemat ahte háliidit kurssa dárogillii go olu fágatearpmaid lea váttis áddet sámegillii ja dalle masset oasi kurssa sisdoalus. Dasa lassin leat mis olu dárogielat oasseváldit go mii leat áidna geat lágidit ADHD-kurssa váhnemiidda ja fuolaheddjiide Finnmárkku. Dá lea dattege juoidá maid árvvoštallat viidáset ja boahtte áiggis soaitit fállagoahtit kurssaid maiddái sámegillii, čilge Boine ja joatká.
- Giđđadálvvi lágidit sihke artrose-kurssa ja váibmo-kurssa sámegillii. Mii geahččalit heivehit nu bures go vejolaš sihke gielalaččat ja kultuvrralaččat. Mii áigut ráhkadit jahkeplána mii vuhtiiváldá sámi kultuvrra, ealáhusaid ja árbevieruid. Dán láhkai sáhttá ovdamearka dihte boazodoalli dahje luomečoaggi plánet goas heivešii buoremusat oassálastit kursii. Jus fuobmá ahte kursa lea justa giđđajohtima dahje luomeáigge, de diehtá ahte seamma kursa lágiduvvo fas maŋŋel.
Jus ii leat Sámi klinihka SÁNAG dahje sámi spesialisttadoavtterguovddáža pasieantta, muhto áiggošii searvat oahppan- ja hálddašankursii, de ferte fástadoavttir dahje buohcceviessu ráhkadit čujuhusa.
Sámi klinihka oahppan- ja hálddašanguovddáža plánejuvvon kurssat ovdal 2024 geasi:
- Revma-kursa: njukčamánu 4.-5. beivviid
- Artrose-kursa: cuoŋománu 8. beaivvi
- Váibmo-kursa: miessemánu 13.-14. beivviid
- ADHD-váhnenkursa: geassemánu 10. beaivvi