Ohcá eambbo sámi dievdduid dutkanprošektii
SÁNAG – Sámi Klinihka stipendiáhta Marianne Larssen dutká sámi dievdduid iešsorbmenváttisvuođaid. Dál lea gearggus čađahit eanet jearahallamiid mat galggaše nannet gelbbolašvuođa ja buoredit dikšofálaldaga.
- Dássážii lean dahkan guokte jearahallama. Dál lean gearggus čađahit lassi ságastallamiid ja doaivvun ahte eambbosat háliidit juogadit iežaset vásáhusaid muinna, lohká Larssen.
- Lea hirbmat dehálaš gullat ja čalmmustahttit historjjáid go daid mielde čuovvu dehálaš gelbbolašvuohta midjiide geat bargat suicidalitehtain. Dát gealbu lea maid dehálaš earáide servodagas go iešsorbmenjurdagiid sáhttá čatnat skuvlii, bargoeallimii ja eará beliide olbmo eallimis.
Loga eambbo: Dutká sámi dievdduid iešsorbmeváttisvuođaid
Mávssolaš
Marianne Larssen doavttergrádastipendiáhta galgá nannet gelbbolašvuođa ja buoredit sámi dievdduid dikšofálaldaga. Jus dán galgá ollašuhttit, de dárbbaša Larssen lassi oasseváldiid.
- Mus lea ulbmilin jearahallat lagabui 20 sámi dievddu Norgga beale Sámis. Mun háliidan oktavuođa dievdduiguin geain lea iešguđetge duogáš, ahki, ámmát ja báikečanastat. Mun doaivvun maiddái ahte sihke gieldda- ja spesialisttadearvvašvuođabálvalusas muitalit prošeavtta birra vejolaš oasseváldiide, lohká Larssen ovdal go loahpaha.
- Lea hirbmat gelddolaš, movttiidahtti ja erenomáš mávssolaš bargat dáinna prošeavttain.
Jus háliidat oassálastit dutkanprošeavttas, de sáhtát sáddet e-poastta Marianne Larssenii: marianne.larssen@finnmarkssykehuset.no
Videos muitala Marianne Larssen dutkanprošeavtta oassálastima birra. Filbma lea dárogillii: