Sámi Klinihkkii ásahuvvojit njeallje ođđa virggi
Klinihkkajođiheaddji lea giitevaš go sámi dearvvašvuođabálvalus nannejuvvo.
Sámi Klinihkas lea stuora illubeaivi. Finnmárkku buohcceviesu hálddahusdirektevra Ole Hope lea oainnat mearridan ásahit njeallje ođđa virggi spesialisttadoavtterguovddážii Kárášjohkii.
- Lean hui ilus ja áibbas eará máilmmis. Orun dego balvvaid siste, lohká Sámi Klinihka jođiheaddji Amund Peder Teigmo.
Dát ođas beakkehii maŋŋel go hálddahusdirektevra lei čoahkkinastán Sámi Klinihkain bearjadaga geassemánu 14. beaivvi.
- Mis leamaš hui miellagiddevaš čoahkkin gos fáddán leamaš somatihkka. Dán oktavuođas oaččuimet dieđu ođđa virggiid birra.
Rekrutteregoahtá dalán
Sámi Klinihkka beassá virgádit čuovvovaš bargiid:
- Mánáiddoaktára, spesialistta pediatriijas.
- Nevrologa, spesialistta nevrologiijas.
- Audiográfa
- Buohccedivššára gii galgá jođihit plánejuvvon váibmováidun- ja diabetespoliklinihka
- Mii álggahit rekrutterenbarggu dalán, lohká klinihkkajođiheaddji.
Oassin nuppástuhttimis
Finnmárkku buohcceviessu lea nuppástuhttinproseassas, ja Sámi Klinihka jođiheaddji dadjá ahte ođđa virgádeamit leat oassin dán barggus.
- Oassin Finnmárkku buohcceviesu strategiijas lea ovddidit Sámi Klinihka ja sámi dearvvašvuođabálvalusaid, lohká Teigmo ovdal go loahpa.
- Mun giitán buori gulahallamis ja go hálddahusdirektevra lea dahkan mearrádusa ásahit njeallje ođđa virggi Sámi Klinihkkii.