Konferánsa fuomášuhttá iešsorbmema ja iešsorbmenjurdagiid
Jahkásaččat jápmet 600-700 olbmo iešsorbmemii Norggas. Guovttis golbmasis leat dievdoolbmot. «Ingen manns land – å bryte barrierer i selvmordstanker» konferánsa čalmmustahttá iešsorbmema, iešsorbmenjurdagiid ja iešsorbmenvásáhusaid dievdoolbmoperspektiivvas.
Vivat iešsorbmeneastadeapmi lea 25 jagi. Dan oktavuođas lágiduvvo konferánsa mii fuomášuhttá iešsorbmema, iešsorbmenjurdagiid ja iešsorbmenvásáhusaid.
Konferánsa lea Romssa gávpogis čakčamánu 19. beaivvi. Lágideaddjit leat Vivat, Davvi RVTS ja SÁNAG.
«Ingen manns land – å bryte barrierer i selvmordstanker» konferánssas jerro manin dievddut eai jeara veahki hálddašit iešsorbmenjurdagiid seamma dávjá go nissonat. Livččii go eará dilli jus dievddut hálaše eanet dovdduidis birra vai lea áigi ahte veahkkebálvalus váldá ovddasvástádusa ja láhčá buoret divššu dievdduide?
Konferánssas šaddá maid sáhka oapmahaččaid birra geat masset lagamusaid iešsorbmemii. Sámi artistta ja dáiddár Simon Issát Marainen muitala iežas vásáhusa birra. Son lea massán guokte vielja iešsorbmemii. Botnehis morrašis leamaš luohti ja luondu dehálaš.
Dieđihanáigemearri lea borgemánu 15. beaivvi.