Sámi nuorat sáhttet mielde hábmet alcceseaset digitála dearvvašvuođabálvalusaid
InvolveMENT -prošeakta galgá heivehit digitála psyhkalaš dearvvašvuođabálvalusaid nuoraide geat leat našunála minoritehtat, álgoálbmogat dahje báhtareaddjit. Dan oktavuođas bovdejuvvojit nuorat searvat jearraniskkadeapmái dahje jearahallamii. Dalle beassá ulbmiljoavku ieš muitalit makkár dárbbut sis leat ja dasa lassin dinejit veahá ruđa oassálastimin.
Jus don leat gaskal 16-25 jagi boaris, de sáhtát searvat jearraniskkadeapmái dahje jearahallamii mas muitalat makkár digitála psyhkalaš dearvvašvuođabálvalusaid galggašii fállat sámi nuoraide.
Jearraniskkadeami čađahat digitálalaččat 15 minuhtas, ja dán ovddas oaččut 50 ruvdnosaš skeaŋkakoartta.
Geavat gova QR-koda dahje deaddil dákko.
Dutkit háliidit maid jearahallat álgoálbmotnuoraid, báhtareddjiid ja eará nuoraid geain lea minoritehtaduogáš. Jearahallan bistá birrasii diimmu ja dan ovddas oažžu 250 ruvdnosaš skeaŋkakoartta.
Geavat gova QR-koda dahje deaddil dákko.
Dutkanprošeakta
Stavanger universitehta álggahii ovddit jagi dutkanprošeavtta InvolveMENT mii galgá guorahallat minoritehtanuoraid psyhkalaš dearvvašvuođa.
Dutkama bokte galget maid gávnnahit dovdet go minoritehtanuorat dálá digitála dearvvašvuođabálvalusaid, geavahit go dáid ja lea go sis dárbu heivehuvvon digitála dearvvašvuođabálvalusaide maid bokte earret eará sáhtašii gulahallat dearvvašvuođabargiiguin.
SÁNAG – Sámi Klinihkka lea doaibmaoasálaš dutkanprošeavttas mii loahpahuvvá 2027:s.