Dál sáhtát oažžut veahki davvisámegielat beaivedulkkas Kirkonjárgga buohcceviesus
Kirkonjárgga buohcceviessu lea dál ožžon davvisámegiel beaivedulkka. Ann Karin Porsanger álggii virgái golggotmánus 2026 ja galgá sihkkarastit oadjebas ja buori gulahallama sámegielat pasieanttaid ja dearvvašvuođabargiid gaskka.
Photo: Máret Elle Christensen
Ann Karin Porsanger lea Deanus eret ja hálddaša sihke davvisámegiela ja dárogiela. Son lea bargan gáiddusdulkan guovvamánu 2024 rájes, ja ovttastahttá dál barggu beaivedulkan Kirkonjárgga buohcciviesus gáiddusdulkomiin.
Son lea oahppan buohccedivššár ja sus lea guhkes bargohárjáneapmi dearvvašvuođasuorggis. Dát duogáš addá sutnje buori máhtu dearvvašvuođafágalaš doahpagiid birra ja gulahallama birra pasieanttaid ja dearvvašvuođabargiid gaskka.
Oadjebas gulahallan iežas gillii
Lea dehálaš beassat geavahit iežas giela go deaivvada dearvvašvuođabálvalusain vai ádde dieđuid iežas dearvvašvuođa, divššu ja čuovvoleami birra. Go Kirkonjárgga buohcceviesus lea davvisámegiel beaivedulka, de nannejuvvo sámegiel dulkonbálvalus, dainna lágiin ahte eanet pasieanttat sáhttet oažžut dieđuid iežaset gillii ja hállat dan giela man buoremusat máhttet.
Ná diŋgot dulkka
Dulkonbálvalus lea áibbas nuvttá, ja sihke dearvvašvuođabargit, pasieanttat ja oapmahaččat sáhttet ieža diŋgot dulkka.
Ná sáhtát diŋgot dulkka:
- Digitálalaččat: Diŋgo dulkka dáppe
- Riŋget: 46 84 74 04
Jus plánat rivdet, de sáhttá dulkka maid cealkit eret, goluid haga.
Dulkkas lea jávohisvuođageasku ja sus lea geatnegasvuohta árvvoštallat iežas habilitehta, ovdal go váldá dulkonbarggu. Dát galgá veahkehit pasieanttaid ja oapmahaččaid dovdat oadjebasvuođa go sii geavahit dulkonbálvalusa