Sámi dulkonbálvalusas lea ođđa ovttadatjođiheaddji
Lisa Monica Aslaksen lea álgán Sámi dulkonbálvalusa ovttadatjođiheaddjin, ja son dovdá doaimma bures go lea olu jagiid bargan gáiddusdulkan.
Kárášjohkalaš Lisa Monica Aslaksen álggii Sámi dulkonbálvalusa ovttadatjođiheaddjin golggotmánu gaskamutto.
Sus lea masteroahpu sihke gielas ja servvodatfágas ja sámi girjjálašvuođadiehtagis.
Lisa Monica lea ovdal bargan UiT Norgga árktalaš universitehta lektorin sámi girjjálašvuođadiehtagis. Son lea maid olu jagiid bargan Sámedikkis gos leamaš sihke bargiidjuhkosa seniorráđđeaddin ja giellaossodaga seniorráđđeaddin ja fágajođiheaddjin. Dasa lassin lea son bargan Sámi dulkonbálvalusa gáiddusdulkan 2018 rájes.
- Mun lean olles bargoeallima bargan sámegiela ovddideamen ja illudan beassat bargat ovttas čeahpes bargiiguin dearvvašvuođasuorggis ja erenomážit ovttasbargat čeahpes dulkkaiguin Sámi dulkonbálvalusas. Hui somá boahtit mielbargin SÁNAG/SANKS - Sámi klinihkkii gos beasan leat mielde ovddideamen sámegiela Sámi dulkonbálvalusa bokte, lohká son.
Lisa Monica Aslaksen bargá Sámi Klinihka Romssa kantuvrras.