SÁNAG ásaha dikšobáikki Troandimii
Fargga lea Sámi Klinihkka gávdnamis maiddái Troandimis. Klinihkkajođiheaddji lea vuostáiváldán čoavdagiid Našunála bargojoavkku ođđa kantuvrraide.
Sámi Klinihka jođiheaddji Amund Peder Teigmo leamaš Troandimis. Fargga rahpá oainnat SÁNAG Našunála bargojoavku ođđa dikšobáikki.
- Go rahpat kantuvrra Troandimii, de nannet máttasámiid ja eará sápmelaččaid dearvvašvuođafálaldaga máddin, lohká Teigmo.
Našunála bargojoavku fállá čielggadeami ja divššu mánáide, nuoraide ja rávisolbmuide. Sis lea našunála ovddasvástádus fállat divššu sámi álbmogii.
Vuogas báiki
Našunála bargojoavkkus leat ovdalaččas kantuvrrat Oslos, Plassjes, Hábmeris, Romssas ja Kárášjogas.
Nu jođánit go buot lea sajis ođđa kantuvrrain, de leat gergosat fállagoahtit divššu maiddái Troandimis.
- Dá šaddá vuogas báiki sihke pasieanttaide ja bargiide, lohká Teigmo maŋŋel go leamaš geahččamin ođđa kantuvrraid.
Našunála bargojoavkku kantuvrrat leat Sircus Shopping gávpeguovddážis.