Buoredit fálaldagaid sápmelaččaide

SÁNAG lea ovttas Amathea vuođđudusain ásahan prošeavtta sámi nissonat ja seksuála dearvvašvuohta (Samiske kvinner og seksuell helse). Ulbmil ovttasbargoprošeavttain lea bargat ja seammás ásahit oadjebas seksuála dearvvašvuođa arena sápmelaččaide.
Amathea lea riikaviidosaš dearvvašvuođabálvalus mii bargá áhpehisvuođa botkjumiid lágá olis (Lov om svangerskapsbrudd).

Amathea fállá dieđuid ja bagadeami válljenvejolašvuhtii mii lea čatnon áhpehisvuhtii ja abortii. Fállá sagastallama sihke ovdal ja maŋŋil aborta, nuvttá áhpehisvuođateasta ja prevenšuvdnabagadallama. Fállá maid bálvalusaid mat váikkuhit servvodaga bargui eastadit dáhtokeahtes áhpehisvuođa ja aborta. Amathea váikkuha maid ovdánahttit ođđa máhttu ja lasi gelbbolašvuođa servvodagas dasa mii guoská nissonolbmuid dearvvašvuhtii ja reproduktiiva dearvvašvuhtii ja vuoigatvuođaide (SRHR). Amathea lea guhkit áigge čađa bargan ovttadássásaš vuoigatvuođaid ovddas sápmelaččaide dasa mii guoská SRHR.

Eanet Amathea birra gávnnat: amathea.no

Reproduktiv helse (SRHR) doaba sisttisdoallá vuoigatvuođaid, suodjalit dávddaid ja veahkaválddálašvuođa vuostá, vejolašvuođa oažžut prevenšuvnna ja nissonolbmuid vuoigatvuođat čađahit áhpehisvuođa ja riegádeami iežaset áigumušaid ektui.

Gáldu: Store norske leksikon

Riŋges, sáddes sms:a dahje e-boasta dahje chatte!

Prošeaktajođiheaddji lea Ingunn Eriksen guhte lea buohccidivššár ja sexologa. Su bargobása lea SÁNAG:s Kárášjogas. Ingunn muitala ahte sii geat háliidit suinna váldit oktavuođa sáhttet riŋget, sáddet sms dieđu dahje e-boasta, maiddái anonyma. Ii oktage gažaldat leat jallas gažaldat dahje váralaš jearrat deattuha Ingunn:

Telefon 81532005/ Sms/telefon 90652042
Epost Ingunn.Eriksen@amathea.no

Dahje váldde anonymaoktavuođa dáppe: www.amathea.no

Leat guhkes gaskat Finnmárkkus ja de sáhtát ge munnje sáddestit sms ja 2018 rájes lea maid vejolaš geavahit Amathea chatprográmma ja mus lea jávohisgeatnegasvuohta muitala prošeaktajođiheaddji Ingunn Eriksen.
Iežas doaimmas áigu Ingunn jođašit miehtá Finnmárkku, sihke joatkkaskuvllain ja allaskuvllain. Mun áiggun ságastallat seksuála dearvvašvuođa birra ja sávan olu mávssolaš ja buriid ságastallamiid nuoraiguin ja rávisolbmuiguin dáid fáttáid birra. Dát fálaldat ii galgga buhtadit otnáš dearvvašvuođafálaldagaid, muhto galgá doaibmat dego lassi resursan muitala Ingunn.

Fálaldagaid nannet sápmelaččaide

Mii áigut nannet ja buoredit sámi álbmogii dearvvašvuođafálaldagaid ja šaddá ge hui dehálaš ovttasbargu Amathean muitala SÁNAG jođiheaddji Gunn Heatta. Ingunnas lea nana ja dehálaš gelbbolašvuohta seksuála dearvvašvuođa gullevaš hástalusaiguin. Son lea oahppan sexologa ja buohccidivššár ja dán ovttasbargu jáhkán šaddát hui ávkkálažžan ja dehálaš. Mii beassat fárrolaga dagahit iežamet buorebun dán fáttá ektui oaivvilda Heatta.
Amathea vuođđudusas leat riikaviidosaš bálvalusat ja bargit miehtá riika, earret go sámi guovlluin. Dát leige sivvan manin vuođđudusa direktevra, Hildegunn Bomnes dál oinnii dárbbu ja ovddidii áigumuša nannet bargguset sámi guovlluiguin. Boađusin šattai ge dát ovttasbargu SÁNAG:n mii bistá guokte jagi, mas guovddážis lea sámi nissonolbmot ja seksuála dearvvašvuohta.